Հաշվի առնելով ինֆեկցիոն հիվանդությունների հասցրած հնարավոր տնտեսական վնասները, պետությունը սեփական միջոցներով կատարում է միջոցառումներ առավել տարածված և վտանգավոր ինֆեկցիոն հիվանդությունների կանխարգելման համար:

Ինֆեկցիոն հիվանդությունների կանխարգելմանն ուղղված բոլոր գործողությունները կոչվում են հակահամաճարակային միջոցառումներ:

Աղյուսակ 1-ում նշված է ՀՀ-ում պետպատվերի շրջանակներում իրականացվող  հակահամաճարակային միջոցառումների պլանը` գյուղատնտեսական տարբեր տեսակի կենդանիների համար: Ներկայացված հիվանդություններից մի քանիսի նկատմամբ իրականացվող միջոցառումները կատարվում են ելնելով տվյալ հիվանդության նկատմամբ տարածաշրջանի անապահովության աստիճանից:

ՀՀ-ում պետպատվերի շրջանակներում իրականացվող հակահամաճարակային միջոցառումների պլանը

                        Աղյուսակ 1

Ծանոթագրություն. Ելնելով հանրապետությունում առաջացած կենդանիների վարակիչ հիվանդությունների համաճարակային վիճակից` անասնաբուժական պետական տեսչությանն իրավունք է վերապահվում նշված ցանկում կատարել լրացումներ և փոփոխություններ` Հայաստանի Հանրապետության պետական բյուջեով հատկացվող գումարների սահմանում: 

Մեծ, միջին և փոքր ֆերմերային տնտեսությունների ղեկավարները պետք է կարևորեն և հատուկ ուշադրության արժանացնեն ինֆեկցիոն հիվանդությունների դեմ կատարվող վակցինացումները և այլ միջոցառումներ:

Հիշեք` Տնտեսապես ավելի շահավետ է կանխարգելել հիվանդությունը, քան բուժել այն:

Ստորև ներկայացված են  ԽԵԿ-երի որոշ ինֆեկցիոն հիվանդությունների պատվաստանյութերի, պատվաստման եղանակների և ախտորոշիչ միջոցառումների մասին տեղեկություններ, որոնք իրականացվում են պետպատվերի շրջանակներում:

Դաբաղի կանխարգելման միջոցառումներից է ողջ գլխաքանակի վակցինացումը: Կան մի շարք վակցինաներ: Մեզ մոտ հիմնականում օգտագործում են հակադաբաղային պոլիվալենտ ֆորմոլ վակցինա (հայկական և ռուսական) A, O և Asia-1 տիպերից:

Մինչև 2 ամսական հորթերին վակցինացում չի թույլատրվում, սակայն դաբաղի բռնկման դեպքում հորթերը նույնպես կարող են վարակվել: Տարածաշրջանում դաբաղի առկայության դեպքում մինչև 2 ամսական հորթերի վարակումը կասեցնելու համար կարելի է ներարկել սկզբից հակադաբաղային շիճուկ, որից 10-14 օր անց վակցինացնել: Իմունիտետը օրգանիզմում ձևավորվում է 21 օր անց և պահպանվում է 6 ամիս:

Խշխշան պալարի դեմ իմունացման համար օգտագործում են խտացված հիդրոքսիլ ալյումինային ֆորմոլ վակցինա ( խոշոր եղջերավոր կենդանիների և ոչխարների խշխշան պալարի): Վակցինացումը կատարում են արոտ հանելուց 2 շաբաթ առաջ:

Բրուցելյոզի դեմ ՀՀ-ում պետպատվերի շրջանակներում տարին երկու անգամ իրականացվում է  արյան ախտորոշիչ հետազոտություն:

ՀՀ-ում տուբերկուլյոզի կանխարգելման նպատակով պետպատվերի շրջանակներում տարեկան երկու անգամ իրականացվում է կենդանիների համակարգված ախտորոշիչ հետազոտություն:

Հիվանդությունը ժամանակին ախտորոշելու նպատակով 2 ամսականից բարձր հասակ ունեցող խոշոր եղջերավոր անասուններին պարանոցի 1/3 հատվածում ներմաշկային ուղիով ներարկում են   տուբերկուլին: Ստուգումը կատարում են 72 ժամ անց: Արդյունքը համարվում է դրական (կենդանին համարվում է հիվանդ), եթե ներարկման տեղում առաջանում է 3 սմ-ից մեծ այտուց, որը չունի որոշակի սահմանազատում, խմորանման է և  ցավազգաց:

ՀՀ-ում սիբիրախտի կանխարգելման համար իրականացվում է վակցինացում պետպատվերի շրջանակներում:

Ակտիվ իմունացման համար օգտագործում են հակասիբիրախտային ՍՏԻ և 55 տարատեսակի կենդանի թուլացված չոր և հեղուկ վակցինաներ: Մատղաշին առաջին անգամ վակցինացնում են 3 ամսական հասակից և վերավակցինացնում 6 ամիս հետո, այնուհետև ինչպես հասակավորները` տարին 1 անգամ:

Պաստերելյոզի վակցինացման համար օգտագործում են խոշոր եղջերավոր անասունների, գոմեշների և ոչխարների հակապաստերելյոզային կիսահեղուկ վակցինա: Վակցինացումը կատարվում է երկնվագ: Այժմ կա նաև էմուլսացված վակցինա, որը ներարկվում է մեկ անգամ պարանոցի 2 կողմերից 1.5 -ակամ մլ դոզայով, և իմունիտետը  պահպանվում է 1 տարի: Սակայն պետպատվերի շրջանակներում վերջինս չի տրվում: