2016թ-ի հունիս-հուլիս ամիսների ընթացքում Սյունիքի Անասնաշուկայում կազմակերպվեց “Անասնապահության ոլորտում ժամանակակից տեխնոլոգիաներ և մեթոդներ” դասընթացը Սիսիանի և Գորիսի շրջանների 26 համայնքների 13-16 տարեկան 364 դպրոցականների համար (որոնցից 164-ըˋ աղջիկ):

Դասընթացի նպատակն էր դպրոցականների շրջանում զարգացնել անասնապահության ոլորտում գիտելիքներն ու հմտությունները, ավելացնել նրանց հետաքրքրությունը
 անասնապահի և անասնաբույժի մասնագիտության հանդեպ, ինչպես նաև տարածել այդ գիտելիքները նրանց հասակակիցների շրջանում: 

Դասընթացների նախաձեռնությունը հետևանքն է այն փաստի, որ Սյունիքի մարզում, ինչպես և Հայաստանի մյուս շրջաններում, առկա է այն խնդիրը, որ դպրոցականները հետաքրքրված չեն անասնապահությամբ և հետևաբար գոյություն ունի Անասնաբույժի/անասնապահի մասնագիտության հանդեպ գրավչության պակաս: Սյունիքի մարզում անասնաբույժ-մասնագետի միջին տարիքը 53 է, նրանց մոտ 20%-ը 60 անց են : Կարիքը կա երիտասարդ անասնաբույժների, ովքեր կկիրառեն անասնաբուժության մեջ նոր մեթոդներˋ սովորելով տարիքով անասնաբույժներից և փոխարինելով նրանց թոշակից հետո:

21-րդ դարում անասնապահության ոլորտում գոյություն ունեն բազմաթիվ նոր տեխնոլոգիաներ և մեթոդներ ու քանի որ երեխաները ավելի ընկալունակ են և ճկուն կարծրատիպեր կոտրելու և նոր տեխնոլոգիաներ կիրառելու հարցում, որոշվեց դպրոցականների շրջանում  անցկացնել ներածական դասընթացներ անասնապահության ոլորտում նոր տեխնոլոգիաների և մեթոդների վերաբերյալ` նպատակ ունենալով բարձրացնել այս ոլորտի մասնագիտությունների հանդեպ հետաքրքրությունը:

“Անասնապահության Զարգացման Ծրագիր Հայաստանի Հարավում” ծրագրի շրջանակներում կազմակերպված դասընթացների ընթացքում ներկայացվեցին և քննարկվեցին հետևյալ թեմաները` անասնապահության նպատակը, հորթերի կերի և հիգիենայի ժամանակակից մեթոդները, կթի հիգիենա, ավտոմատ կիթ, մանրադիտակի կառուցվածքը և այլն: Այս բոլոր թեմաների տեսական ներկայացումից հետո մասնակիցները Սյունիքի Անասնաշուկայում հնարավորություն ունեցան գործնական կիրառել իրենց հմտությունները նշված ոլորտներում: Երեխաները սովորեցին` ինչպես աշխատել լուսային մանրադիտակի հետ, ինչպես պահպանել կենդանու հիգիենան, ինչպես կերակրել կենդանուն և կիրառել ավտոմատացված կիթը, ինչպես նաև ինչպես օգտագործել գյուղատնտեսական այլ սարքեր: Արդյունքում Սիսիանի և Գորիսի դպրոցականները ընդլայնեցին իրենց իմացությունները անասնապահության հիմնական սկզբունքների շուրջ: