Հունիսի 10-ին Սյունիքի մարզի Տաթեւ համայնքում գտնվող Սյունիքի Անասնաշուկայի տարածքում անցկացվեց «Ոչխարների խուզում» երրորդ փառատոնը։

Փառատոնը կազմակերպել էր «Ռազմավարական զարգացման գործակալություն» հասարակական կազմակերպությունը՝ Շվեյցարիայի Համադաշնության Զարգացման և Համագործակցության Գործակալություն (SDC) և «Հայաստանի զարգացման նախաձեռնություններ» (IDeA) հիմնադրամի համաֆինանսավորմամբ։

Փառատոնի նպատակն է առավել ճանաչելի դարձնել Վայոց Ձորի եւ Սյունիքի ավանդույթներն ու մշակույթը, մարզերի տեղական արտադրանքը, ինչպես նաեւ նպաստել տարածաշրջանում զբոսաշրջության զարգացմանը:  Ընդհանուր առմամբ, փառատոնին մասնակցել է 2000  մարդ։

 «Ոչխարների խուզում» փառատոնը վերածվում է ավանդական միջոցառման։ Այս տարի մասնակցեցին բազմաթիվ համայնքներ Սյունիքից ու Վայոց Ձորից: Փառատոնը համայնքային կյանքն աշխուժացնելու, մոռացված ավանդույթները վերհիշելու ու մարզերի տեղական արտադրանքը զբոսաշրջիկներին ներկայացնելու հնարավորություն է տալիս։ Ուրախալի է, որ շատ զբոսաշրջային ընկերություններ փառատոնը ներառում են իրենց առաջարկներում։ Սա վկայում է այն մասին, որ տարեցտարի այս միջոցառման նկատմամբ հետաքրքրությունը մեծանում է», - ասել է IDeA հիմնադրամի տնօրեն Էդգար Մանուկյանը:

Փառատոնն այս տարի ընդգրկում էր ոչխարների խուզման մրցույթ, ազգային կենդանի երաժշտություն, պար, լարախաղաց, սպորտային  միջոցառումներ,  ցուցահանդես-վաճառք, որտեղ իրենց արտադրանքը ներկայացրեցին Վայոց Ձորի եւ Սյունիքի համայնքների արտադրողները: Փառատոնի հյուրերը հնարավորություն ունեցան օգտվելու տեղում կազմակերպված սննդի տաղավարներից՝ համտեսելով հայկական ավանդական ճաշատեսակներ:

«2008թ.-ից սկսած Ռազմավարական Զարգացման Գործակալությունը, Շվեյցարիայի կառավարության ֆինանսավորմամբ իրականացնում է Անասնապահության Զարգացման ծրագիր Սյունիքի, իսկ 2014թ. նաև Վայոց Ձորի, մարզերում, որի շրջանակներում իրագործվում են մի շարք միջոցառումներ՝ ուղղված ֆերմերների գիտելիքների և կարողությունների զարգացմանը, կաթի և մսի շուկաների հասանելիության բարելավմանը, անասնաբուժական և արհեստական սերմնավորման ծառայությունների խթանմանը, ինչպես նաև համայնքային արոտների կառավարման արդյունավետության բարձրացմանը: Այս համատեքստում կարևորում ենք «Ոչխարների խուզման» փառատոնի և նմանատիպ միջոցառումների կազմակերպումը, որոնք թույլ են տալիս մեր շահառու համայնքներին ներկայացնել իրենց արտադրանքը լայն հանրությանը, շփվել միմյանց հետ և բարձրացնել իրենց մարզի զբոսաշրջային գրավչությունը: Այս ավանդական դարձած փառատոնը այսուհետ իրականացվելու է Սյունիքի Անասնաշուկայի տարածքում, - նշեց ծրագրի ղեկավար՝ Կարինա Հարությունյանը:

 «Ոչխարների խուզում» երկրորդ փառատոնն անցկացվել էր 2015թ․-ին՝ Տաթեւի Հալիձոր կայանում։ Դրան մասնակցել էր ավելի քան 3000 մարդ, այդ թվում ԱՄՆ-ից, Ռուսաստանից, Իսպանիայից, Բելգիայից։